GURO + MAG-AARAL = TAGUMPAY

Minsan sa aking buhay, mapanghamon na tinanong ako ng aking kaibigan, "Ano ba talaga ang trabaho ng isang guro?" Sinagot ko siya na "Siyempre magturo at humubog ng kinabukasan." Ngumiti siya sa akin at alam ko na tama ang aking sagot sa kaniya ngunit, ang hindi ko napaghandaan ay ang epekto sa akin ng kanyang katanungan. Parang hinila ako pabalik sa mga nakalipas na taon ng aking pagtuturo at pinilit na magkaroon ng isang repleksyon. Napaisip ako, ano nga ba?

           

Alam naman ng karamihan na higit sa pagtuturo ang propesyon ng isang guro. Isa itong interdimensional na trabaho. Yung tipong nagtuturo ka ng wika pero kailangan mong pasukan ng values, o kaya naman nagtuturo ka ng Math at kailangan mong ipaunawa sa mga mag-aaral kung ano ang halaga nito sa buhay. Dito ko napagtanto na ang tunay na trabaho ng guro ay ang turuan ang mga mag-aaral na matuto hindi lamang ng mga teorya, ng mga numero, ng pagbabasa, ng pagsulat, at ng iba pang mga bagay na pang-akademiko. Bagkus, ang tunay na trabaho ng guro ay ang impluwensyahan ang kanyang mga mag-aaral para sa magandang kinabukasan katulad ng isa sa mga mensahe ni Sabrina Ongkiko sa Our Return on Investment sa Ted Admu. Hindi ito madali sapagkat kailangang maging maingat sa lahat ng ginagawa, maaari kasi na mabuti at masamang impluwensya ang maibigay ng isang guro. Kumbaga, sa aming mga kamay nakasalalay ang ikabubuti ng ating lipunan. Isang mabigat na pasanin kung tutuusin sapagkat buhay ng isang bansa ang pinag-uusapan natin. Ngunit, sa kabila ng mabigat na pasaning ito nakalulungkot isipin na maliit ang pagtingin sa mga guro. Kagaya na lamang ng pananaw ng ibang magulang sa kanilang mga anak na "Anak, medyo mahina ang ulo mo, mag-teacher ka na lang." O kaya naman ang sweldo na palagay ko ay hindi kalakihan para sa aming trabaho at kadalasang nagiging sanhi ng paglo-loan at pagtitinda ng kung ano-ano na ikinakabit sa pangalan ng mga guro. Ngunit ang higit na masakit ay ang madalas na pagkakaroon ng maliit na pagtingin ng mga mag-aaral sa karamihan ng mga guro. Yung tipong pagkatapos ng isang taon parang hindi ka na bahagi ng kanilang buhay at ang masaklap yung hindi ka na nila maaalala kahit kailan. Para sa akin kasi, walang guro na hindi nag-effort para sa kanyang mga mag-aaral. Sigurado ako, kahit papaano nag-isip siya kung paano niya maipauunawa sa mga mag-aaral ang isang aralin at paano niya mapapabuti ang kanyang mag-aaral. Madalas kasi, nililimitahan ng mga mag-aaral ang pananaw nila sa kanilang guro dahil sa mga asignaturang kanilang itinuturo. Halimbawa na lamang kung ang asignatura ay boring, mahirap, o masyadong madali madalas na hindi na nila type ang kanilang guro. O di kaya naman sa pisikal na itsura ng kanilang guro gaya ng mukhang masungit, mukhang mahinhin, mukhang mabait (na pwedeng abusuhin) at marami pang iba naibabatay ang pagkatao ng isang guro. Kung may ganitong pananaw at pangmamaliit sa mga guro mula sa lipunan, naniniwala ako na mahihirapang makaahon ang ating bansa sa pagkakalugmok.

           

Sa pagbabalik-tanaw ko sa aking buhay guro, naiba rin ang aking pananaw sa pagtuturo at tagumpay. Dati, palagi ko lang sinasabi sa mga mag-aaral na dapat nilang galingan sa klase at dapat silang magsikap upang magtagumpay. Ngunit, hindi pala sapat iyon sapagkat kinakailangan na kasangkot siya sa tagumpay na ito. Kailangan na ang isang guro ay maging mabuting impluwensya sa kanyang mga mag-aaral sa mabuting paraan. Mahalaga na maging positibo ang pananaw katulad ni Sabrina Ongkiko tungkol sa mga mag-aaral upang maging positibo rin sila sa kanilang sarili, upang maisip nila na makakaya nila ang isang bagay sapagkat may guro na handang gumabay at hindi mawawalan ng tiwala sa kanilang kakayahan kahit na ilang ulit silang magkamali. Gayundin, kailangan ang sangkap na isang Mag-aaral, sapagkat hindi niya maaabot ang tagumpay kung hindi magiging positibo ang kanyang pananaw sa kanyang mga guro, kung hindi niya kikilalanin ang mga sakripisyong inilalaan nila upang mapabuti ang isang buhay. Sa pagtatagumpay, kailangan ang dalawa, ang guro at ang mag-aaral. Sa hinaharap, alam ko na maiiba na ang sasabihin ko sa aking mga mag-aaral, at iyon ay walang iba kundi "Anak, upang maging matagumpay mangarap at magsumikap ka kasama ang iyong mga guro."        

Sabrina Ongkiko: Our Return on Investment sa Ted Admu

https://www.youtube.com/watch?v=FgOi4ZR57fA